我朋友B比人撞跌左部iPhone電話，我見到之後，覺得自己有能力可以幫下手，咁A就話自己都想幫B手。我捐左錢比B，阿A就話佢會幫B代收住先，好啦，咁我照比左錢阿A啦。
點知過左幾日，A竟然同B講，叫B賤價賣部只係爛左Mon嘅電話，仲要即時唔比B繼續用電話，理由竟然係為左B好，話爛Mon可能會界親手咁樣。
咁都算啦，但係爛Mon咋嘛，部機真係仲用到架喎，B都未Backup部機啲野，但係A又唔比B掂部機喎，佢報左警搵警察幫佢睇住部機，呀~ 啲警察又真係聽佢講喎，點解？我唔知啦，咁又唔關啲警察事嘅，有人報案，佢地都係做野姐。但係B就係因為咁，就再唔可以攞返部手機。個村莊咪比人攻擊囉，我講緊隻Game，多年來B貨左好多金，花左好多時間去起條村。
我見到咁唔合理，咪同A講，咁樣唔得喎，咁我話晒都係捐錢嘅金主，都有啲牙力嘅，A頂唔住我煩佢，佢又唔捨得我捐果3000蚊。就係咁，A就比B掂左部電話半個鐘，大佬，半個鐘喎，B backup到個whatsapp，又唔夠時間backup啲相喎，但係A話「無喇，時間就比左你，陣間界親手就煩，係咪？你肯賣部機未？」我再鬧多次，A之後安排多一日，比B掂多一次部手機半個鐘。有L用咩，幾10Gb野，半個鐘邊度夠，嘥氣。
呢個故仔個精髓係邊呢？就係A係用我捐嘅錢去買B部機，自己補1500蚊就得，佢會比返部小米電話給B用的。我捐左3000蚊，華強收緊部爛Mon Iphone 都比人6000蚊人仔啦！大佬，人地本身iPhone17pro，你比返部小米人……咁就叫幫左，A真係叻仔！
我捐果時邊有諗過會係咁發生。咁我想攞返果3000蚊就咁算啦，A又同我講，果3000蚊攞左落佢銀包，啲錢同佢自己啲錢撈埋左一齊，唔方便亦唔會比返我。咁我反正捐左出去，部電話又真係唔係我嘅，我唯有咁就算啦。
我冇左3000蚊，都係因為捐錢，都算喇，唉，我諗住換個Mon，3000蚊乜都夠嘛，鬼知咩……
搞笑嘅係，其實B部機係豐閘買，買果時配埋果個乜乜乜平安心保，話爛左會賠全新機。豐閘見到A咁玩法，死都唔出聲，唔賠住啦。你賣L左部iPhone去華強，我分分鐘唔洗賠，幾爽。
B先慘，唔捨得部手機啲相，B一日唔比部機A，未去到華強，都仲叫有個存檔，去左華強真係乜都無。望住部小米，都算喇，型號都唔知果下仆街嘛，去邊度攞貨又唔知，行貨定水貨又唔知，陣間一開機，印度文黎嘅？都唔知點用落去。
然後搞笑呀，A有一日同我講，話B唔肯賣部機比佢，係B搞事喎😂 仲話夾硬都會要佢賣。我真係唔知比咩反應好，我又學到野啦。
跟住我發現原來唔知A個老豆定阿爺，係豐閘個老闆🙃
宏福苑的朋友
漏左樣野，就係B賣畀A時，Ａ叫Ｂ簽返一張聲明書，聲明自己係自願並非遭受強迫或脅迫。
支持。
支持。
故事概括了人禍其中的真實。那惡人不斷地顯出其”不是”。故事未完！