有各方愛國名流倡議全香港搞個穿華服日，要求政府定每年11月22日為“全港華服日”，鼓勵香港市民日常著華服工作和生活，「以更好地傳承中華文化，樹立民族自信，宣揚中華美德，振奮民族精神。」華服係乜東東呢？大概是中華之服裝。
中華文明是世界早熟的文明，史上可徵有五千年啦！內地其實二三十年前都興過嘅。如果你鼓勵穿漢服其實係好唔環保嘅，亦都好浪費。事關唔同等級嘅人有唔同嘅要求，有些仲要戴帽有條腰帶，少女穿着漢服跳呢個漢宮秋月，你學佢就煩啦，因為嗰個衣袖大到可收埋個B、小狗，你話係咪浪費？日本人穿和服，是由唐服傳去，京都一帶保留最多唐風，和服呢其實係通常係有典禮儀式或者有大節日佢哋就着嘅。
如果你認真講究起嚟呢就煩啦着成粒鐘點搞？咁後來內地嗰啲搞穿漢服嘅小圈就聲沉影寂。
我老師陳湛銓是國學大師，直到今天由陳老師書寫和作的一幅山聯對聯，是寫在大嶼山寶蓮山門，這是全個寶蓮寺寫得最好的山聯墨寶。我師身為國學大師好古，但他生前同我講：孔子啊活喺今天啊佢都會着西裝。陳老師好多高足學生已經是好出名有啲成為大教授啊，可以證明他說的呢一句㗎。
提倡中華文化我一萬個贊成。
我倡議寫甲骨文，尤其因應天氣越嚟越熱，去嗰啲蕉園摘晒啲芭蕉葉，喺車站地鐵站叫阿嬸好似當派免費報紙咁樣每人派一件，用塊葉遮住前面就得啦後面見屁股都唔怕，反正向前看大家後面都睇唔到。第一個環保啦，第二日涼爽啦，第三呢就復古證明我哋都係炎黃子孫太初遺風，同時寫甲骨文。
仲有一定可以刺激旅遊全世界嘅人士都有興趣過嚟睇吓，包括天體嘅包括想裝嘢嘅包括對人類文化風俗有研究興趣嘅。唔使派送50萬張機票俾人哋！
舒柏得