危機應急管理，說時易，行之一點不簡單甚至難；必須有一套系統性管理，機動快，這是檢驗一個城市是否世界級的重要標準。廿年前911紐約，日本多次地震海嘯下大城市表現，都是表率。香港多次風災水災，由英治至今天特區，尤其9.78（9月7日8日）巨災，火急應對善後，其系統硬淨，交出成績，不妨讚啦！
今次可冠名為9.78雨災，是繼五十多年前6.18暴雨成水災的戰後最大劫，全港九新界大嶼山離島無一倖免。政府各部門做得好，配合得好有效率。柴灣是重災區，環翠道因為山上墳場和柏加山一大片區帶，匯聚雨水成為河流，啲水係由山嗰度一路成條河咁衝落嚟，下邊末段道路便受山大壓力，路面幾乎一舉衝爛，路不成道。
幾十年前618試過一鋪，嗰陣時呢度係沖死人㗎。
我見證過當年，因為我哋家族就喺呢一度開酒家同埋冰室，睇住啲水衝落嚟全黃坭水砂石垃圾，喺路中間救人過馬路嗰個衝死咗，記得是青年人。當天我為此也寫下日記，十八九歲，現在今天已經72歲了。昨天下午我去視察災情還見到啲舊街坊不勝感慨，尚幸大家健在。有個舊街坊以前做三行，就話當年啲路都沖爛咗而家執生真係快手，看來鋪立青係兩三日之間嘅事，否則呢條路一爛咗去歌連臣角就去唔到。
新聞見到石澳道嗰邊已經出唔到嚟又入唔到去，啲糧食我諗都要諗辦法點樣送入去。幸而福地環海，水路東西兩廂沿海可運送，大吉。
許平
先後做了四十年的新聞出版、經濟投資和國際金融分析，曾擔任經濟報章總主筆、雜誌總編輯出版人、在大學教過書等等。現任兩個傳媒人團體理事，香港經濟師學會顧問。